XA QUEDA MENOS PARA O DESAFÍOS EN DIABETES.

O vindeiro 16 de maio, Vigo converterase nun punto de encontro único para persoas con diabetes, familias e profesionais sanitarios coa celebración dunha nova edición de Desafíos en Diabetes, organizada por ANEDIA.

A xornada contará cun cartel de gran nivel, reunindo a seis poñentes referentes nas súas áreas. Por unha banda, participarán profesionais da área sanitaria de Vigo, representando tanto a pediatría como a endocrinoloxía de adultos. E ademais, ANEDIA contará coa presenza de catro convidados chegados de fóra de Galicia que destacan a nivel estatal pola súa experiencia e traxectoria en diabetes.

Entre eles estarán a educadora en diabetes Belinda Lozoya, referente en tecnoloxía aplicada á diabetes; o nutricionista Serafín Murillo, unha das voces máis recoñecidas en alimentación e diabetes; a matrona Rocío García-Viso, que abordará os retos da maternidade e a diabetes; e o psicólogo Iñaki Lorente, especializado en saúde emocional e diabetes.

Un dos aspectos máis especiais desta xornada é que gran parte dos poñentes non só traballan no ámbito sanitario, senón que tamén conviven coa diabetes no seu día a día, achegando unha visión moito máis próxima, humana e real.

Desafíos en Diabetes busca crear un espazo de formación, reflexión e encontro arredor dunha realidade que desafía cada día a miles de persoas e familias. A través desta iniciativa, ANEDIA continúa apostando pola educación diabetolóxica, o apoio mutuo e a creación de comunidade en Galicia.

A actividade celebrarase no Hospital Álvaro Cunqueiro de Vigo e a participación estará aberta tanto a persoas con diabetes como a familiares, persoas coidadoras e público interesado.