Un espazo seguro para compartir, aprender e construír comunidade
Os días 22 e 23 de agosto de 2025, ANEDIA organizou no Ecoparque de Marín a primeira edición de COMPARTE DIABETES +18, unha actividade formativa e vivencial dirixida a persoas adultas con diabetes tipo 1, especialmente entre os 18 e os 30 anos.
A proposta xorde dentro do Proxecto BETA, cofinanciado polo V Plan Social de ENCE, como resposta a unha necesidade crecente: ofrecer formación especializada e espazos de apoio para persoas que, a pesar de ser tratadas como pacientes “autónomos”, seguen precisando acompañamento, actualización e redes de iguais coas que compartir a súa realidade.
Un grupo diverso cun obxectivo común
A actividade contou inicialmente con 18 prazas, pero debido á alta demanda foi necesario ampliar prazas. A maioría eran persoas mozas (entre 18 e 25 anos), pero tamén asistiron perfís máis diversos en idade, vivencia e historia coa enfermidade.
A pesar das diferenzas, o grupo destacou pola súa cohesión, respecto e coidado mutuo. Houbo espazos compartidos para todo o grupo, pero tamén momentos formativos separados por intereses e realidades específicas: homes, mulleres, momentos íntimos e conversas abertas que foron máis aló do programa previsto.
Formación especializada e vivencial
Durante as dúas xornadas, o grupo participou en diversas actividades formativas lideradas por profesionais de recoñecido prestixio, que tamén achegaron a súa experiencia persoal:
-
Mario Rivas, psicólogo sanitario e educador en diabetes, abordou con grupo de homes a saúde emocional, as relacións interpersoais e a sexualidade. A sesión prevista para hora e media acabou converténdose nun espazo de diálogo profundo que durou máis de tres horas.
-
Rocío Maraver e Karla Meneses (La Mesa Azul), nutricionistas e membros do Grupo de traballo de Muller e Diabetes da Sociedade Española de Diabetes (SED), conduciron un taller centrado no ciclo menstrual, a alimentación e a diabetes. As mulleres participantes destacaron o alivio e a comprensión que supuxo poñer palabras e contexto a síntomas e vivencias que moitas levaban anos sen entender.
-
Iria González Fontán, residente de enfermaría da Área Sanitaria de Pontevedra e tamén persoa con diabetes tipo 1, foi a encargada da sesión do venres. Achegou unha visión práctica sobre os recursos dispoñibles en atención primaria, os dereitos das persoas con diabetes e a importancia de coñecer e reclamar unha atención de calidade.
Máis alá das sesións: apoio real entre iguais
Un dos aspectos máis valorados polos participantes foi o espazo informal compartido fóra das actividades programadas. Conversas nocturnas, confesións espontáneas, aprendizaxes entre iguais… Historias sobre debuts, deporte de alto nivel, parella, planificación do embarazo ou incluso outras enfermidades conviveron coa parte máis técnica da formación.
“Agora teño un grupo co que podo compartir o que me pasa.”
“Moitas das cousas que sentía teñen agora unha explicación.”
“Necesitabamos isto. Non hai nada igual para nós.”
✅ Un punto de partida
COMPARTE DIABETES +18 deixou unha sensación común: isto só acaba de comezar. As persoas participantes expresaron o seu interese en seguir vinculadas, repetir a experiencia e incluso colaborar en futuras actividades formativas, especialmente coas xeracións máis novas.
A actividade celebrouse no Ecoparque de Marín, un espazo natural que axudou a crear un clima relaxado e seguro. O aloxamento foi en bungalows, e o programa incluíu cea e almorzo, cun copago simbólico de 30 € por parte das persoas participantes. Todo o demais estivo cuberto grazas ao apoio do V Plan Social de ENCE.
Grazas a todas e todos
Desde ANEDIA queremos agradecer:
-
A todas as persoas participantes pola súa entrega, respecto e confianza.
-
Ao equipo de profesionais, polo seu rigor e humanidade.
-
E a ENCE, por facer posible esta actividade a través do Proxecto BETA
Seguimos traballando para construír espazos onde a vivencia con diabetes tipo 1 na idade adulta sexa entendida, acompañada e valorada como merece.
Pronto, máis.
#ComparteDiabetes #DiabetesTipo1 #AnediaGalicia
#ProxectoBETA #VPlanSocialEnce #SomosTipo1
#SaúdeEmocional #EducaciónEnDiabetes #VivenciaCompartida