Un paso histórico para a diabetes tipo 1 en Europa
A Unión Europea vén de aprobar Teizeild (teplizumab), o primeiro tratamento capaz de atrasar a aparición dos síntomas da diabetes tipo 1, marcando un antes e un despois no abordaxe desta enfermidade autoinmune crónica.
Trátase dun fito histórico, xa que por primeira vez non falamos só de tratar a diabetes unha vez diagnosticada, senón de intervir antes de que a enfermidade se manifeste clinicamente, abrindo a porta a unha nova etapa na prevención e no manexo temperán da diabetes tipo 1.
Que sabemos hoxe sobre as fases iniciais da diabetes tipo 1
Nos últimos anos avanzouse moito no coñecemento das fases iniciais da diabetes tipo 1. Sabemos que a enfermidade non aparece de forma repentina, senón que atravesa diferentes etapas.
Na chamada fase 2, as persoas xa presentan autoanticorpos contra o páncreas, o que indica que o proceso autoinmune está en marcha, pero aínda non existen síntomas clínicos nin é necesaria a administración de insulina.
É precisamente nesta fase onde pode aplicarse Teizeild. Os estudos clínicos realizados demostran que este tratamento consegue atrasar a progresión cara á diabetes tipo 1 clínica unha media de dous anos, e nalgúns casos incluso máis tempo. Isto supón gañar anos de calidade de vida sen tratamento con insulina e cun impacto emocional e sanitario moi relevante, especialmente en nenos, nenas e persoas novas.
Un cambio de paradigma, pero non o final do camiño
A aprobación europea deste medicamento supón unha nova era na diabetes tipo 1, pero o verdadeiro impacto non virá só da autorización regulatoria.
Para que este avance se traduza nun beneficio real para as persoas e as familias, é imprescindible que o tratamento sexa
• accesible
• coñecido
• e aplicado no momento adecuado
E aquí comeza agora un proceso clave.
Os seguintes pasos para que Teizeild chegue á vida real
Aínda que a autorización europea é un paso decisivo, quedan por diante varios retos fundamentais
Negociación de prezo e financiamento en cada país
Definición clara de onde, como e en que condicións poderá prescribirse
Formación e información aos profesionais sanitarios, especialmente en atención primaria, endocrinoloxía e pediatría
Información e acompañamento ás familias, para que poidan tomar decisións informadas
Impulso de programas de detección temperá, incluíndo o cribado de autoanticorpos, sen os cales este tratamento non pode aplicarse a tempo
Sen estratexias de detección precoz, este avance corre o risco de quedar limitado a moi poucas persoas.
O papel de ANEDIA
Desde ANEDIA recibimos esta noticia con enorme satisfacción e esperanza, pero tamén con responsabilidade.
Sabemos que a innovación non chega soa. É necesario
• seguimento institucional
• vontade política
• coordinación entre administracións
• e participación activa das persoas pacientes e das asociacións
Por iso, desde ANEDIA seguiremos moi atentas aos seguintes pasos que se dean, especialmente no ámbito estatal, e ao papel que xoguen organismos como o Ministerio de Sanidade e a Axencia Española de Medicamentos e Produtos Sanitarios.
Porque este é só o comezo.
O reto agora é que este avance chegue a tempo, chegue a quen o necesita e chegue con equidade, independentemente do lugar de residencia.
Seguimos
Porque a diabetes tipo 1 tamén se cambia desde a investigación, a prevención e a acción colectiva.